حصة حول تامين المظاهرات (1) عن مظاهرة الثلاثاء 20/3
كتبهاأحمد عبد الفتاح ، في 19 مارس 2007 الساعة: 06:15 ص
وعدت قرائي الاعزاء ان اكتب لهم تدوينه عن أمنيات المظاهرات والعيوب التي قد نقع فيها وما يجب فعله ومقارنة بين الفكر الاخواني وغيره من الافكار في عملية تامين وتسيير وتنظيم المظاهرات والاخطاء التي وقعت فيها حركة كفاية في مظاهره 15/3 بميدان التحرير والتي ادت لان تكون المظاهره ضعفيفه ، وانا عند وعدي ولكن جد في الامر شئ وهو اعلان حركة كفاية عن مظاهره يوم الثلاثاء 20/3 اما مجلس الشعب الساعه 3 بعد الظهر وهو ما دعاني لان اكتب عن بعض الاحتياطات لهذا اليوم ثم اعود واكتب الموضوع الذي وعدتكم به .
اذن فلنتحدث عن مظاهره 20/3 ، ونسيب بقه الكلام بالعربية الفصحي ونتكلم بالمفتشر لان الموضوع محتاج تركيز .
أول شئ لازم نشوف ايه معلوات المظاهره .
المكان : أما بوابة مجلس الشعب بشارع مجلس الشعب المتفرع من ش القصر العيني
الزمان : الثلاثاء 20/3 الساعه 3 بعد الظهر
الوصف : مظاهره اعتراضا عالتعديلات الدستورية عند بوابة مجلس الشعب وفي نفس الوقت يتجمع النواب عند سلم المجلس للاعتراض .
وحتي الان لا تتوافر معلومات اخري لدي يعني هنشتغل بالمعلومات ده
ولازم هنا نفهم ياجماعه ان المظاهره ده جزء كبير من نجاحها يتوقف علي المكان وهو بوابة المجلس تماما ، ليه ؟ لان 
النواب هيبقوا متجمعين برده عند البوابة وده هيدي زخم للمظاهره .
يبقي احنا متفقين ان هدف اصيل اننا نوصل للبوابة . طب اذاي والامن متوقع منه ايه ؟
الامن هيبقي هدف كبير عنده ان المظاهره متمش قدام بوابة المجلس بالرغم من ان الشارع هادي لان وسائل الاعلام هتعمل شغل كبير ولان ده هدف مهم للمظاهره . وهيحاول الامن بكل الوسائل حصار المظاهره في شارع الفلكي أو شارع منصور ويعمل ذي ما عمل يوم الخميس .
يبقي لازم يكون في دماغنا اننا منتحبس ومنتجرش للمكان ده باي شكل من الاشكال .
كمان الامن مش هيسمح للمظاهره في ش القصر العيني لانه شارع حيوي مينفعش يتقفل الا للريس طبعا .
يبقي الوضع كالاتي
المفروض يحصل
ان كل النشطاء يظهروا وفي لحظة واحدة تقريبا من بداية شارع مجلس الشعب ومن اخره من ميدان مجلس الشعب ومن شوارع الفلكي ومنصور وكله في اتجاه بوابة المجلس .
لو حصل ده في لحظه واحده هيربك قوات الامن والاندفاع لعدد كبير في وقت واحد من كذا اتجاه هيخل الامن مضر انه يحاصر المظاهره قدام بوابة المجلس لانه اخف الاضرار وهو المطلوب .
والتاكيد علي اللحظة الواحده مهم جدا عشان متشتتش المظاهره ذي ما حصل يوم 15/3
2- ياريت نروح المظاهره في مجموعات من 5 افراد لان ده بيقلل احتمال القبض عليك وتتجمع المجموعات عند اوائل الشوارع قبل المجلس
3- اثبتت التجارب ان شكل المظاهره بيتوقف علي اول 5 دقائق في عمرها وعلي حسب المكان الي بتحتله في اللحظه ده عشان كده لازم الاندفاع عالبوابة وبقوه لان لو ده محصلش عمرنا ما هنوصل لها .
4- ياريت بلاش المظاهر الثورية واحنا رايحيين مظاهره يعني الاعلام والشارات وخلافه خليها لما تقف في المظاهره .
5- بلاش الناس الي وشها من النوع المالوف تيجي بدري اصلا وياريت تيجي بعد ما المظاهره تاخد وضعها وكده كده هتدخل
6- ياريت نقراء تعليمات زنزانة قبل المظاهره والي منشوره علي مدونتها .
————————————————–
مفتاح الخريطه
دائرة حمراء : الهدف ( بوابة مجلس الشعب )
اسود : تمركز جنو امن مركزي متوقع
دائرة حمراء مفرغه : شوارع محتمل حبس التظاهره فيها
ملاحظه هامه
ما ورد هنا هو رايي المحض وليست تعليمات من حركة كفاية او غيرها كما انني اطرحها من قبيل النصح فقط
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
مارس 19th, 2007 at 19 مارس 2007 5:15 م
طب وهتعمل إيه في الجحش ابن الجحش المخبر اللي بيقرا التعليمات دي وبيبلغها لهم عشان يتنيلوا يعملوا حسابهم؟؟؟
بسيطة ندعي عليه انشالله يجيلو شلل رباعي وعمى حيثي وطرش هستيري مع إسهال حاد يخليه يهر على روحه ويتكرع بصوت عالي مع تشنجات في الجسم كله وكإن عليه عفريت
يا كلاب أمن الدولة استعدوا للغد (لأ مش حزب الغد يا أهبل انت وهو) الغد اللي هو بكرة… والغد لناظره قريب… وللأخ العقيم هاني جرجس بتاع قصر النيل وأخوه الرائد محمد الأنور (طبعا تسألني إزاي هاني جرجس ومحمد الأنور يبقوا اخوات أقول لك عادي الاتنين اولاد كلب)… أقول لكما ظبطوا محاضركوا كويس وتحرياتكوا بلاش تعتمدوا فيها على الورق بتاع الأرشيف فضحتونا الله يخرب بيوتكوا… جايبين قايمة المطلوبين الأرشيفية بتاعة أحداث القضاة؟ يا راجل عيب عليكوا… وبعدين الأخ هاني جرجس (ولا علاقة قرابة على الإطلاق بينه وبين الحاج جرجس) متحول للتحقيق بسبب المسخرة المعمولة في التحريات… مش عايزين الفضايح دي تاني
سلام بقى يا عم احمد وأقابلك بكرة في المظاهرة وبعد بكرة في الزنزانة
نياهههههاهههههااااا
مارس 19th, 2007 at 19 مارس 2007 5:31 م
عارف يا جرجس ايه اهم عيب في الامن لازم نستغله ؟
الغرور
فهمت يا نجم ؟
مارس 19th, 2007 at 19 مارس 2007 6:33 م
ههههههههههههههههههههههههه
مش عارفة انت جبت اللاماضة دي منين مع انك اخوان
الواضح انكم بتاخدوا فرق كاراتية وكنغو فو وكمان استراتيجية وتكتيك ههههه
انا مرتضش اجيب سيرة ان الناس ضروري تعمل حسابها ع السجاير عشان يبقوا مستفذين اكتر وكلهم حماس وغضب احسن تفتكر انى عاوزاهم يبطلوا
انت نسيت كور وعلامات مهمة الاولي ان لكل مدون ظابط وراه بيقنعوه بعدم التظاهر
وكمان المخبرين او عساكر الامن اللى لابسين مدني
بقولك متقلقش من المخبر المسؤول عن مدونتك دا اهبل وغبي وشكله كان امين شوربة ونزلوه رتبة عشان غباوته تلاقيه دلوقتى ماسك الجرنان المخروم وبيبص من الخورم علي مدونتك
اتكل على الله وميهمكش هجيب لك الحاج عبد السلام معايا، ولا تحب اسميها زهرة؟زي ع فتاح القصري؟
مارس 19th, 2007 at 19 مارس 2007 7:23 م
انا مش موافق على الخطة دى .. اولا توافد الناس مرة واحدة يلفت النظر للمظاهرة ويخلى محاصرتهم بعيد عن مكان المجلس سهل .. خصوصا ان الرصد مش من مكان المجلس حايبقى من الشوارع المحيطة ..
مهم جدا الناس ما تشيليش حاجات ظاهرة فى ايدها زى اللافتات والورق والشارات علشان ما تلفتش النظر .. والاخ اللى بيلزق علامة كفاية على كل حتة فى ملابسه وبيبقى عامل زى تاكسى العاصمة ياريت ما يجيش المظاهرة اصلا ..
والافضل من ذلك انا باقترح اننا نجيب خريطة للمكان من على جوجل إرث ونتقابل حولين ترابيزة فى البروصة ونقعد نحط الخطة علشان يجيوا ياخدونا من بليل من على القهوة ونخلص .
مارس 19th, 2007 at 19 مارس 2007 7:41 م
وانا موافق حدد المكان والزمان واحنا معاك
مارس 19th, 2007 at 19 مارس 2007 7:54 م
تعليقك يا أستاذ أحمد يا حلمي نكتة بجد خليتني ضحكت ضحك هستيري… خلاص يا زعيم معادنا ع البورصة والمشاريب تبقى على حساب لجنة الإعاشة طبعا
ههههههههههههههه
مارس 20th, 2007 at 20 مارس 2007 2:50 ص
ايه يا جنرال احمد الحلاوة ده
متقلهم حتروح الساعة كام كمان
وخد معاك احمد عثمان
عشان ناصري
يا بني كلنا مشبوهين
مش حيدخلوكم من ميدان التحرير
انت مشوفتش الصورة اللي عند جرجس اللي الضابط بيصور فيها المتظاهرين
بس بجد شغل اخوان علي كبير برافو عليك
مش كنت نفعت الزمالك بدل الوكسة اللي هما فيها
خاص: لحبايبنا الحلوي المخبرين اللي قروا مدونتك اللي تخصصهم شتيمة وقباحة
اتنيلوا علي عينكم و بطلوا قلة ادب
مارس 20th, 2007 at 20 مارس 2007 3:06 ص
ايه يا عم الدماغ الجامدة دي
انت متأكد ان انتوا مش بتاخدوا دورات تكتيك و استراتيجية
على العموم يا جنرال كلنا بكرة هنبقى وراك
مارس 21st, 2007 at 21 مارس 2007 4:20 م
انا أول مرة فى حياتى أشوف تحرك تكتيكى على مدونة أو على الايميل … وبعدين انت غيرت الشغلانة ولا ايه