تقريبا كل قراء مدونتي الاعزاء عارفين اني مش بكتب علي المدونة حاجات شخصية - طول عمري مدي وقتي وجهدي 
للشعب- بس الي حصلي النهرده مخليني مش عارف اسكت .
الله يسامحها امي عندها قدرة غريبة علي تعكير الافكار فبعد ان كنت ناوي اكتب تدوينه ناريه عن جدار الفصل العنصري لان اليوم يوافق الذكري الثانية لبدأ الاعمال الاحتجاجية ضده ونظر محكمة لاهاي في مدي مشروعيته أستطاعت امي بقدرة قادر تحول التدوينه ده لتدوينه عن مسح الشقة .
النهرده الجمعه - عادي يعني - الواحد يصحي متاخر يفطر فول ينزل يصلي ذي ما كل الناس بتعمل لكن ابت امي الا وان تجعله يوم مميز ، صحيت الصبح الساعه 10 علي حد بيشد ملاية السرير من تحت مني قال عشان يغسلها وبعدين اكياس المخدات ودوشة وتلفزيون شغال عالاخر وصوت قران طالع من الكمبيوتر بس علي مين انا نايم الفجر ، قاومت كل ده وفضلت نايم لحاد ما حصل الي حصل .
أمي قتحت دولابي وبدات تاخد الكتب بتاعتبي وترميها في كيس زيبالة اسود كبير قال ايه بتنظف وانا كله الا الكتب عندي وخصوصا اني كنت لسه امبارح مفضي دولاب الهدوم بتاعي عشان الاقي مكان للكتب الي مش لاقي ليها مكان فقمت ثائر طبعا ورجعت الكتب عشان افاجا انها كمان عملت كده في كتب الكلية بتاعتي وانها بالفعل رمتها في شنط زبالة وسابتها عالسلم وكل ده بحجه النظافه وخد عندك بقه لقيت في الشنط سيديهات وشرايط وكل ما يمكن ان تتصوره مع العلم يا جماعه ان امي مثقفه وخريجه دار علوم وعندها مكتبة كبيرة جدا بس تعملوا ايه بقه في النظافة ومع اعلم برده انها كتير جدا بتستلف مني الكتب ده وخصوصا لما تحب تقرا في السياسة .
المهم ان حرب النظافة لسه شغاله وانا طبعا مضطر ارابط في البيت لحاد لما اشوف اخرة الموضوع ده ايه وخصوصا اني شايف انها عايزه تغسل الكمبيوتر كمان عشان عليه تراب وبقاله كتير مش اتغسل مع العلم برده انها بتستغل اي فرصه انا فيها بره وتقعد عالكمبيوتر
بذمتكم مش حاجه تجنن ؟؟؟
كتبها أحمد عبد الفتاح في 01:54 مساءً ::
يا شيخ حرام عليك
انت اللى مستفز بكمية الحاجات اللى حاططها هنا وهناك ربنا يصبر مامتك عليك
ويصبرنى انا كمان
وهو بقه حضرتك مين اصلا ؟؟؟
طالما اصبح الموضوع علي صفحات المدونات هكذا هحكي لكم عن الاستاذ احمد العبقري احمد له ثلاثة اخوه هو اكبرهم ولكن لنا الله امه المسئوله عن كل شيء في البيت امه امراة عامله وتتحمل مسئولية البيت كامله واحمد هذا لم اراه يساعدها يوما اشوفها وهي تحمل طلبات المنزل وتقوم بالتنظيف ولها اهتمامات اخري واحمد ده كداب
انت تتحدث عن امك لقد فتحت علي نفسك النار!!!!!!!!
كم هي مسكينه امك لا تجلس علي الكمبيوتر الا عندما تخرج يعني انت لا تعطيها فرصه لك الله ياام احمد
احمد مره امك حكت لي طرفه عنك قالت انك تضع الهدوم الغير نظيفه في الدولاب وتطلب منها ان تشم الهدوم لتعرف النظيف من المتسخ
فقالت لك هوه انا قطة
عيب يا ولد تسأل مين اللي باعت
أعلنت الحرب أوزارها في بيتكم يا أحمد، ويبدو أن جبهتك اضعف من أن تواجه ماماتك، حيث أنه واضح من كلامك أنها ما شاء الله هجومية من الدرجة الأولى واستطاعت بحركة واحدة جريئة أن تطوح بالكتب والسي دي هات والشرايط على سلم بيتكم، أعانك الله على إعادة غنائم الحرب التي كادت أن تكون بين مخالب قطة ضالة أو الراجل بتاع الجرايد اللي بيجيلنا كل كام جمعة،،،،، بص يا ابني، إما أن تتجه لعقد هدنة مع ماما ويا حبيبتي يا ماما وإيدك ابوسها، وإما أن تلملم جنودك وتتأهب لمحاولة جديدة لإلقاء بقية حاجياتك خارج شقتكم، أنا أشك انك في يوم هتلاقيها شايلاك انت شخصياً وبتقولك: ايه الكراكيب دي!!!!!!!!!
ده انا ابنك يا مامااااااااااااااا، ضيناكي!!!!!!
احمد ابا اعرفك وقلت لمامتك لاترد عليك دخلت بيتكم مرة ورايتك تدخل من باب الشقة بالحذاء رتدوس علي كل السجاد ودخلت الحمام وخرجت وشاهدت والدتك تفوم بعد ذلك بتنظيف الحمام تماما لانه اتسخ بشده والله علي ما اقول شهيد
انا واحدة تانية برضة اعرفك تدعي ان مامتك اخدت منك كتب سياسة متي ياتري اصبحت صاحب مكتبة مدبولي ياراجل احنا كلنا بناخد منها كتب دي حتي كل ما تدور لي علي كتاب ولاتجد تقول اكيد احمد سلفه اوضيعه طب فين كتاب فقه السنه الجزء الاول وكتاب مذكرات الدعوة والداعية
الحقيقة الجنان انها تقعد معاك في بيت واحد ياريت تشوف لك بيت تاني تقعد فيه وتريحنا بصراحة الصراحة راحة واللي يطق يطق
أموت و أعرف مين أول واحدة دي يا أحمد بس بجد شكلها صادقة و بتعاني منك الله يصربهن يارب
انت بتعمل ايه في الست الوالدة منك للي كلت دراع جوزها ، عامة شكلها خدت بتارها من سيادتك ، يلا ربنا يقويها كمان و كمان ، على فكرة أنا ساعات بعمل أكثر من كدة ربنا مع الأمهات جميعااااااااااااااااا
فعلا يا احمد هي حاجة تجنن لكن تعمل ايه ماهي فى النهاية برضه امك ولا زم تستحمل وربنا يقويك
الاخ الاوسط (الجاهل) شاهد عيان علي هذا البيت :احمد خد دولاب هدومي بوضع اليد وحاطت فيه كتبه وهترسي بكره علي ايـــــــــــــــــــــــــــــــــــــــــه.
و الله الست الحاجة عندها حق ، كتب إيه و هباب إيه ، و المشكلة لو كانت كتب كويسة من عينة رجل المسحيل و المكتب رقم 19 و كمان المكتب رقم 95 ، المهم النظافة حلوة برضو ، الله يكون فى عون الزبالين.
أنا عازرك يا أحمد الظاهر أن العيشة فى شقة عبدالرحمن فى أسيوط هى حلك وعلى فكرة ياحج أحمد إنت آخرك تجرى ورا عربية دقيق فى الشارع TENSORههTENSOR!!!!!!!!!
