أعياد وامتحنات وتعديلات وحبشتكنات
كتبهاأحمد عبد الفتاح ، في 23 ديسمبر 2006 الساعة: 21:57 م
اخواني واخواتي
أذيكم عاملين ايه ؟
ياتري كماشنين وبردانين وقاعدين تحت البطاطين ؟
ولا ذيي سبتم السرير ومشيتم تحت المطر حاطين ايدكم في جيوب الجاكت وبرده كماشنين ؟ وخلو بالكم من نزلات البرد
ولا انتم من المجتهدين اياهم الي قعدوا يذاكروا رغم البرد ده كله ؟
ولا انتم بتعملوا ايه بالضبط ؟
عارفين
انا لما بسرح وافكر في اليومين الفل الي احنا عايشنهم دول بحس اننا محظوظين
ايوه محظوظين ومتبصليش كده
الموضوع باختصار اني بعد بحث مضني لقيت حاجه
انه علي مر التاريخ لم يتسني ( حلوه يتسني ده مش كده ؟ ) لجيل من الاجيال انه يشوف الي احنا شايفينه ده كله في وقت واحد
تفتكرم ان حد قبلنا ربنا رزقه بثلاثة اعياد كده مره واحده ومعاهم برد يجنن ده غير امتحنات ده غير شوية مطاردات امنية علي شويه شتيمه في الجرايد ومش هحكيلك بقه علي فلسطين والعراق ولبنان ولا ايران ….. الخ .وطبعا فوق كل ده تيجي المنحه الساميه من الرئيس السيامي قصدي السامي بالتعديلات الدستورية اياها .
طب بذمتكم حد في الناس الي عدوا قبلنا علي محطة الدنيا شاف كل الحروب ده الي احنا شايفنها . ده انا متيقلي اني لو سالتك عن عدد عدوا علي محطة الدنيا هيبقي اسهل من السوال عن عدد الحروب في الايام الميمونه ده ( ده مش نسبة الي ميمون القرد الشهير ولكن ميمون تاني بس برده قرد ).
بصراحه اخي العزيز لو حضرتك فكرت لو مجرد تفكير انك تفكر في كل تفصيلة من الي بيحصل حولينا ده هتجنن عالاقل.
طيب السوال في ظل شبورة الكائبة الي عملتهالنا يا أ/ احمد نعيد اذاي ؟ نفرح اذاي ؟
بعد ما اكح كحتين عشان اوضح ان الكلام الجاي ده هيبقي جامد اخواني الاعزاء انا بعد عناء لقيت الطريقه المثلي للاحتفال بالعيد والعام الجديد والمتحنات وبالمرة التعديلات الدستورية خدوا النصيحه ده وادعولي
بكره بعد الساعه 12 بالليل كده وبعد شحنة الايمنيات في وقفه عرفه وبعد ما تكوي هدوم العيد وقبل ما تستحمي حموم العيد اخرج اه اخرج في البرد ده وللبنات بلاش خروج عشان الرقابة بلاش اطلعوا في البلكونه هات ورقة وقلم واسرح واسرح واسرح ويا سلام لو جنبك حتة مزيكا لعم عمرو خيرت ( مش حتة لحمة باقيه من الفطار هه ؟ ) انا مش هقول
ك بقه احلم بعام جديد سعيد والكلام الحمضان ده لاني عارف انك زهقان منه بكل بساطه انا عايزك تكتب في اول الصفحه رايح فين ؟ وانا دلوقت فين ؟ وهروح اذاي ؟ بس جاوب التلات اسئله ده وصدقني الي فرق بين خيرت الشاطر المليونير الي حب يخدم دينه فجمع له ربنا دنيته واخرته وبين عم محمد بتاع الفول والي لا ربنا اداله شئ من الدنيا ولا الدين انه جاوب علي الثلاث اسئله ده لو جوبت علي الاسئله ده هيكونوا اول الطريق للاجابه علي السوال الغامض الي هو انا مين ؟ >
2 تعليق على “أعياد وامتحنات وتعديلات وحبشتكنات”
اكتب تعليــقك
ديسمبر 31st, 2006 at 31 ديسمبر 2006 11:33 م
لو الشتاء بيخلى الناس تبدع كده
يا ريت السنة كلها شتــــــــــــــــــتتتتتاء
يناير 2nd, 2007 at 2 يناير 2007 12:22 م
كل سنة وانتم طيبين
جزاكم الله خيرا على المجهود
بس يا ريت نذاكر بقى .. امتحانات امتحانات